𝐓𝐈𝐍𝐆𝐍𝐀𝐍: Sa pagpapatuloy ng pagsulong at pagpapalaganap ng kahalagahan ng seguridad panlipunan at kalusugan sa hanay ng mga transport cooperative sa bansa, isinagawa ng Office of Transportation Cooperatives (OTC) ang Social Security and Health Protection Program (SSHPP) Seminar sa Cagayan de Oro City noong ika-25 ng Hulyo 2024.

Dinaluhan ng nasa 97 kinatawang opisyales at kasapi mula sa 28 transport cooperatives sa nasabing lungsod at bayan ng Misamis Oriental, binigyang-daan muli ng OTC ang mga mahahalagang kaalaman tungkol sa iba’t ibang programang pang-seguridad panlipunan at proteksyon pangkalusugan na dapat isaalang-alang ng mga transport cooperative.

Bahagi pa rin ito ng malawakang inisyatiba ng Ahensya sa pakikipagtulungan sa Social Security System (SSS), Pag-IBIG Fund, at PhilHealth, na maibahagi muli sa mga kooperatiba ang mga rekisito, pamantayan, at alituntunin at gabay kung paano pangasiwaan at tuparin ang kanilang responsibilidad para mapakinabangan ng kanilang mga tsuper at iba pang manggagawa ang mga benepisyo at serbisyo ng nasabing mga ahensya.

Tinalakay sa nasabing seminar ang mga serbisyo na alok ng tatlong (3) ahensya sa mga kwalipikadong kasaping-benepisyaryo nito. Kabilang na rito ang mga programa na maaaring tumugon sa mga pangangailangan ng kanilang miyembro sa aspetong pinansyal, edukasyon, kalusugan, at iba pa. Sa katunayan, ilan sa mga partikular na ibinahagi sa seminar ay ang proseso sa pagkuha ng Pag-iBIG Fund Provident Saving at Loyalty Card Plus, gayundin ang mga karapatan sa ilalim ng Republic Act 11223 o ang Universal Health Care Act na ipinaliwanag ng PhilHealth, at ang iba’t ibang loan programs, employment, at unemployment benefits ng mga miyembro ng SSS.<

Bukod sa talakayan, naglaan din ang OTC ng maikling panahon at pagkakataon upang mabigyang-linaw ang mga katanungan ng mga lumahok sa seminar sa pamamagitan ng isang open forum at booth consultation sa harap ng mga kinatawan ng Pag-IBIG Fund, SSS, at PhilHealth. Mayroon pang natitirang dalawang (2) seminar ang isasagawa sa taong ito na gagawin sa Rehiyon 5 at CAR.