𝐓𝐈𝐍𝐆𝐍𝐀𝐍: Bilang bahagi ng misyon na ipaabot ang kaukulang tulong sa hanay ng mga manggagawa sa sektor ng pampublikong transportasyon, muling ipinagpatuloy ng Office of Transportation Cooperatives (OTC) ang pagsasagawa ng seminar hinggil sa mga batas at karapatan sa usaping paggawa noong ika-26 ng Hunyo 2024 sa 888 Events Place, Dadiangas West General Santos City.

Katuwang ang mga sangay ng Workers’ Welfare and Protection Cluster ng Department of Labor and Employment (DOLE) tulad ng Bureau of Working Conditions (BWC), Employees Compensation Commission (ECC), Bureau of Labor Relations (BLR), at National Wages and Productivity Commission (NWPC), muling tinalakay sa seminar ng mga kinatawan ng mga nabanggit na ahensya ang mga pangkalahatan at mahahalagang alituntunin at pamantayan na dapat isaalang-alang ng mga transport cooperative upang matiyak na sapat ang sahod at benepisyo na natatanggap ng bawat empleyado nito.

Ipinaliwanag din sa naturang seminar ang General Labor Standards at Occupational Safety and Health Standards Program (OSHSP) na layong maiwasan ang anumang aksidente, mabawasan ang pinsala, at mapanatiling ligtas at malusog ang mga manggagawang Pilipino tulad ng mga tsuper at iba pang mga kaalyadong manggagawa sa lugar ng kanilang trabaho, sa pamamagitan ng pagbibigay-diin sa tungkuling bitbit ng mga namumuno sa kooperatibang kanilang kinabibilangan.

Sa kabuuan, dinaluhan ng higit 100 opisyal o taga-pamahala mula sa 42 iba’t ibang transport cooperatives sa loob ng Region 12 ang isinagawang seminar ng OTC, kung saan nabigyan din ng pagkakataon na mabigyang-tugon at linaw ang mga katanungan ng mga lumahok at iba pang mga bagay na kaugnay sa paksa at maiparating sa mga kinauukulan ang hinaing at suhestyon na lubos na mapakikinabangan ng kanilang hanay.