𝐓𝐈𝐍𝐆𝐍𝐀𝐍: Sa ikalawang araw ng Basic Fleet Management System (FMS) Seminar, patuloy na diskusyon at aktwal na aplikasyon ng mga natutunan ang naging talakayan at gawain sa pagpapatuloy ng pagsasanay na isinagawa ng Office of Transportation Cooperatives (OTC) at ng University of the Philippines – National Center for Transportation Studies (UP-NCTS) noong ika-07 ng Agosto 2024 sa Sta. Cruz, Maynila.

Ibinihagi ni Engr. Julshabar U. Halil ng UP-NCTS ang proseso kung paano mabisang maitatala ng mga transport cooperative ang mga mahahalagang datos o impormasyon sa kanilang kabuuang operasyon partikular na ang paggamit ng isang simple o basic na teknolohiyang pang-impormasyon upang mapabilis at mapagaan ang pagsisiyasat at pagsubaybay sa pagmintena ng mga sasakyan at iba pang gastusin ng mga kooperatiba, kabilang ang konsumo sa produktong petrolyo.<

Tinalakay rin ni Ginoong Glenn Simon D. Latonero ang kahalagahan ng wastong pamamahala ng yamang-tao sa kooperatiba na binigyang-diin ang papel ng mga tsuper. Ipinaliwanag dito ang mga rekisito na kinakailangang isaalang-alang at makita sa mga tsuper at sa kanilang mga pampublikong sasakyan upang masiguro na sa pagbibigay ng serbisyo sa mga mananakay ay maisasakatuparan ang ligtas, komportable, kumpiyansa, at kaaya-ayang biyahe ng mga ito. Binigyang-diin din ang mahalagang papel ng mga tsuper at iba pang kaalyadong manggagawa upang umungos at pangalagaan ang imahe ng kooperatiba sa publiko.

Bukod dito, ipinaliwanag din ni Ginoong Geoel Anthony Y. Esguerra ang konsepto at pamamaraan ng “Fleet Dispatch Management” habang binigyan naman ng pagkakataon ni Engr. Sheila Flor Dominguez-Javier na makapag-balangkas ng sarili nilang “implementation work plan” ang mga lumahok na transport cooperative bilang bahagi ng pagsasanay nito sa pagpapatupad ng FMS.

Sa huli, binigyang-diin ni OTC Officer-in-Charge (OIC) Chairperson Reymundo D.J. De Guzman, Jr. sa isang espesyal na mensahe na ang naturang seminar ay isang pagbibigay ng armas o instrumento upang magamit at umalalay sa mga kooperatiba sa pagpapatupad at pakikilahok nito sa Public Transport Modernization Program (PTMP).