𝐓𝐈𝐍𝐆𝐍𝐀𝐍: Dumayo ang Office of Transportation Cooperatives (OTC) sa Iloilo City upang ipagpatuloy ang pagsasagawa ng seminar hinggil sa “Social Security and Health Protection Program” o SSHPP para sa pagpapalaganap ng kaalaman at pagpapahalaga sa seguridad at proteksyon na panlipunan at kalusugan sa hanay ng mga transport cooperative sa lugar.

Dinaluhan ng 108 na opisyales at kasapi sa 25 transport cooperatives sa Iloilo ang isinagawang seminar na ito noong ika-27 ng Hunyo 2024 sa La Casa de Alma Events Pavilion, Jaro, Iloilo City. Katuwang ang Social Security System (SSS), Pag-IBIG Fund, at PhilHealth mula sa sangay sa Iloilo, inilahad ang ilang mga importanteng paksa kaugnay sa mga kinakailangan, rekisito, at panuntunan tungkol sa seguridad at proteksyong panlipunan at kalusugan, kabilang ang iba’t ibang serbisyo, programa at benepisyo na inaasahang matanggap ng mga kwalipikadong miyembro ng tatlong nabanggit na ahensya.

Sa mga pangkalahatang presentasyon ng mga programa, partikular na ibinahagi, binigyang-linaw, at diin ng tatlong ahensya ang mga batayan, hakbang, at iba pang mga tampok na serbisyo sa kanilang mga programa. Sa diskurso ng PhilHealth, inilahad ang mga probisyon sa ilalim ng Republic Act 11223 o ang Universal Health Care Act na nakatuon sa pagsulong ng karapatan para sa kalusugan ng mga manggagawang Pilipino. Samantala, sa SSS naman ay ipinaliwanag ang kanilang isinasagawang tugon sa pag-iwas ng mga miyembro nito sa pagbabayad ng angkop na kontribusyon tulad ng Run Against Contribution Evaders (RACE). Sa bahagi naman ng diskusyon ng Pag-IBIG Fund, itinaguyod at ipinaliwanag ang mga piling tampok na hatid nitong serbisyo tulad ng Provident Savings, Home Financing, Loyalty Card Plus, at iba pang proseso para sa ilan pang karagdagang mga serbisyo nito. Nabigyan din ng pagkakataon ang mga lumahok sa nasabing seminar na magtanong at magpaabot ng kanilang hinaing o suhestyon kaugnay sa mga paksang tinalakay.