𝗕𝗨𝗪𝗔𝗡 𝗡𝗚 𝗠𝗚𝗔 𝗞𝗔𝗕𝗔𝗕𝗔𝗜𝗛𝗔𝗡 𝟮𝟬𝟮𝟱

Kabilang at kaisa ang Office of Transportation Cooperatives (OTC) sa mga tumatalima sa taunang pagdiriwang ng bansa tuwing buwan ng Marso ng kada taon—ang Pambansang Buwan ng mga Kababaihan o “National Women’s Month”.

Sa tema ngayong taon na,  “𝗕𝗮𝗯𝗮𝗲 𝘀𝗮 𝗟𝗮𝗵𝗮𝘁 𝗻𝗴 𝗦𝗲𝗸𝘁𝗼𝗿, 𝗔𝗮𝗻𝗴𝗮𝘁 𝗮𝗻𝗴 𝗕𝘂𝗸𝗮𝘀 𝘀𝗮 𝗕𝗮𝗴𝗼𝗻𝗴 𝗣𝗶𝗹𝗶𝗽𝗶𝗻𝗮𝘀”, muling pinagtitibay ang tunguhin maitatag ang isang inklusibong lipunan kung saan ang lahat ng kababaihan ay nagtatamasa at nakikinabang ng katimbang na karapatan, kapangyarihan, kalayaan at oportunidad. Ang okasyon na ito ay alinsunod rin sa pangunahing misyon at layunin ng Republic Act No. 9710 (Magna Carta of Women) na bigyan ng dangal ang makasaysayang ugat ng adbokasiya na ito, kabilang ang patuloy na pagpapalaganap ng mga adhikain nito sa lahat ng sulok ng ating lipunan.

Kaugnay nito, nais pasalamatan at bigyang-pugay ng OTC ang mga kababaihang manggagawa at namumuno sa sektor ng pampublikong transportasyon. Kinikilala namin ang inyong makahulugang ambag at dedikasyon na makapagbigay ng mapagkakatiwalaan at kalidad na serbisyo sa ating mga mananakay, kasama ang inyong makabuluhang papel sa maayos na pamamahala ng inyong kooperatiba. Hinihikayat namin ang inyong aktibo at walang sawang pakikilahok sa mga gawain at misyon upang palakasin at pagtibayin ang inyong organisasyon at samahan. Nawa’y magsilbing daan ang pagdiriwang na ito upang maging mas maigting ang pagpapalaganap at pagpupunyagi ng “women empowerment” at walang pagkiling ng kasarian sa ating sektor. 

Mabuhay ang mga kababaihan sa sektor ng mga kooperatibang pansasakyan! Tuloy ang lakbay patungo sa daan ng makatarungan at komprehensibong karapatang-pantao ng mga kababaihan.