𝗣𝗔𝗡𝗧𝗔𝗪𝗜𝗗 𝗣𝗔𝗦𝗔𝗗𝗔, 𝗠𝗨𝗟𝗜 𝗡𝗔𝗡𝗚 𝗔𝗔𝗥𝗔𝗡𝗚𝗞𝗔𝗗𝗔!

Aarangkada na muli ang programang “fuel subsidy” o kilala sa tawag na PANTAWID PASADA para sa mga kwalipikadong operator at tsuper ng iba’t ibang pampublikong sasakyan.  Layunin ng programang ito na ibsan ang mga pasanin at gastusin ng mga operator at tsuper sa pamamasada at tugunan ang epekto ng pabago-bagong presyo ng mga produktong petrolyo.

Ang halaga ng subsidiya na ilalaan ng pamahalaan sa mga kwalipikadong benepisyaryo nito ay naaayon sa karaniwang dami ng konsumo ng gasolina/diesel na kinakalangan ng isang pampublikong sasakyan upang makapasada. Dahil dito, kabilang sa mga maaaring makatanggap ng naturang subsidiya sa halagang 𝗣𝟭𝟬,𝟱𝟬𝟬 ay ang mga operator at tsuper ng Modern Public Utility Jeepney (MPUJ) at Modern UV Express (MUVE). Aabot naman sa halagang 𝗣𝟱,𝟬𝟬𝟬 ang maaaring matanggap ng mga operator at tsuper ng Traditional Public Utility Jeepney (TPUJ), Traditional UV Express (TUVE), Minibus (MB), Public Utility Bus (PUB), at Filcab.  Mayroon namang nakahandang 𝗣𝟰,𝟱𝟬𝟬 na halaga ng subsidiya para sa mga hanay  ng Tourist Transport Services, Shuttle Services, School Transport, Transportation Network Vehicle Service (TNVS), at Taxi.

Bukod dito, kapwa nasasaklaw rin sa programang Pantawid Pasada ang mga rider ng delivery services na inaasahang makakatanggap ng 𝗣𝟮,𝟱𝟬𝟬 na halaga ng subsidiya—gayundin ang mga tricycle driver na maaaring makakuha ng 𝗣𝟭,𝟭𝟬𝟬 na ayuda.

Sa kabuuan, papalo sa 1,026,306 na benepisyaryo ang maaaring makatanggap ng nasabing subsidiya. 286,306 sa mga ito ang magbubuhat sa mga naunang nabanggit na klase ng mga public utility vehicle (PUV), 600,000 mula sa sektor ng tricycle, at 140,000 naman sa hanay ng mga delivery service rider.

Ayon kay Department of Transportation (DOTr) Undersecretary Jesus Ferdinand Ortega, inaasahan ng kagawaran na matatapos ang pamamahagi ng fuel subsidy sa ikalawang bahagi o quarter ngayong taong 2025.

Kaugnay nito, hinihikayat naman ng OTC ang aktibong pagtutok ng publiko sa mga official social media account at website nito upang hindi mahuli sa mahahalagang impormasyon hinggil sa fuel subsidy at sa iba pang mga proyekto o programa ng pamahalaan para sa sektor ng pampublikong transportasyon.