𝐓𝐈𝐍𝐆𝐍𝐀𝐍: Nakiisa ang Office of Transportation Cooperatives (OTC) sa kauna-unahang Arangkada Transport Congress ng iba’t ibang transport cooperatives at corporations mula sa National Capital Region (NCR) noong ika-06 ng Hunyo 2024 sa World Trade Center, Pasay City.
Sa temang, “Arangkada tungo sa Modernong Transportasyon”, pinangunahan ng National Federation of Transport Cooperatives (NFTC) na sinuportahan ng Philippine Chamber of Cooperatives, Inc. at ilang mga ahensya ng pamahalaan ang programa na nakatuon sa patuloy na pagsulong ng mas pinahusay at progresibong sistema ng pampublikong transportasyon sa bansa.
Kabilang sa mga panauhing pandangal na nagbigay ng kanilang mensahe hinggil sa kasalukuyang estado at direksyon ng Public Transport Modernization Program (PTMP) ay sina Department of Transportation (DOTr) Undersecretary for Road Transport and Infrastructure Jesus Ferdinand D. Ortega, OTC Officer-in-Charge Reymundo D.J. De Guzman, Jr., Land Transportation Franchising and Regulatory Board (LTFRB) Chairman Atty. Teofilo E. Guadiz III, at ang mga kinatawan ng ilan pang ahensya ng pamahalaan tulad ng Department of Interior and Local Government (DILG), Cooperative Development Authority (CDA), at Metropolitan Manila Development Authority (MMDA).
Naging bahagi ng talakayan sa nasabing programa ang mga susunod na hakbang ng pamahalaan upang mapanatiling naaayon at sapat ang tulong na naibibigay nito para sa mga transport cooperative at korporasyon na tumutugon sa panawagan para sa pagbabagong anyo, uri at antas ng sistema serbisyo sa ating mga komyuter, kabilang din ang kapakanan ng mga kamay-ari, tsuper, at iba pang manggagawa sa pampublikong transportasyon.